"Oltin kuz" — iqtidorli yoshlar uchun yangi sahna

 

Forum Madaniyat Vazirligi tashabbusi bilan tashkil etilgan bo‘lib, 4-noyabrga qadar davom etadi. Mazkur loyiha yosh ijodkorlarni ijodiy salohiyatini rivojlantirish va tajriba almashishlari uchun muhim maydon bo‘lib xizmat qiladi. Tadbirda Qoraqalpog‘iston Respublikasi, Toshkent shahar va viloyatlardan 18 yoshdan 30 yoshgacha bo‘lgan 250 nafardan ortiq ijodkorlar maqom, rassomchilik, teatr, cholg‘u chalish kabi yo‘nalishlarda o‘z iqtidorlarini namoyon etish orqali ishtirok etmoqda.

 

Ijodiy birlik va yangi imkoniyatlar

Forumda ijodkor yoshlar bilan ishlash bo‘limi boshlig‘i - Dilfuza Shamuratova forum doirasida treninglar, tanlovlar hamda mahorat darslari bo‘lib o‘tayotganligi haqida ta'kidlab o'tdi.

 

Madaniyat Vazirligi Teatr va sirk sanʼati vakili hamda Kinematografiya sohasi faoliyatini muvofiqlashtirish bo‘lim boshlig‘i Zulayho Tursunaliyeva esa - forum doirasida 20 dan ortiq tadbir rejalashtirilgani, xususan drammatik va qo‘g‘irchoq teatr yo‘nalishlarida tanlovlar o‘tkazilib borilayotgani haqida ta‘kidladi. Shu o‘rinda "Teatr sanʼati, drammatika va qo‘g‘irchoq teatri" yo‘nalishi bo‘yicha ikkita tanlovga start berilgani va to‘rt kun davomida eng yaxshi spektakllar tomoshabinlarga namoyish etib borilishi haqida ma'lum qildi.

 

Forum doirasida yoshlar uchun bir qator qiziqarli tadbirlar tashkil etilgan jumladan:

• ijodkor yoshlar safini kengaytirish va ularni davlat tadbirlariga jalb etish maqsadida ijodiy tanlovlar orqali yangi iste'dodlarni saralab olish ;
• yoshlarni o‘ziga bo‘lgan ishonchini oshirishga qaratilgan malakali psixologlar tomonidan motivatsion sessiyalar;
• madaniyatning turli yo‘nalishlari bo‘yicha mahorat darslari va treninglar;
• ijodkor yoshlarning ijtimoiy tarmoqlarda o‘z ijodiy mahsulotlarini keng ommaga targ‘ib etish, ijodkor yoshlar imidji va ijtimoiy mediamarketing yaʼni smm yo‘nalishida seminar treninglar;

 

Forum mobaynida “Nazm gulshani” nomli yosh shoirlar bilan ijodiy uchrashuvlar bo‘lib o‘tadi.

 

Shuningdek forum doirasida 3–10 noyabr kunlari bo‘lib o‘tadigan “Xalqaro kamer va simfonik musiqa festivali” haqida ham ma‘lumot berildi. Madaniyat Vazirligi tomonidan ikkinchi marotaba bo‘lib o‘tayotgan festivalda Germaniya, Qozog‘iston, Qirg‘iziston, Turkmaniston va Tojikistondan ijodiy jamoalar ishtirok etishi kutilmoqda.

 

Forum gala konsert va taqdirlash marosimi bilan yakunlanadi

“Oltin kuz” forumining so‘nggi kuni — 4-noyabrda Turkiston san‘at saroyida gala konsert tarizda bo‘lib o‘tadi. Unda tanlov g‘oliblari va faol ishtirokchilar pul mukofotlari bilan taqdirlanadi.