Rimda o‘rta asr minorasi qulab tushdi: bir kishi halok bo‘ldi
1203-yilda qurilgan tarixiy Konti minorasi restavratsiya vaqtida qulagan.
Italiya poytaxti Rimda joylashgan o‘rta asrlarga oid Konti minorasining bir qismi qulab tushdi. Hodisa oqibatida bir kishi halok bo‘ldi, yana uch ishchi jarohatlandi. Bu haqda BBC xabar berdi.
Ma’lum qilinishicha, voqea 3-noyabr kuni restavratsiya ishlari olib borilayotgan paytda sodir bo‘lgan. Jarohatlanganlarning barchasi qurilish maydonida bo‘lgan ishchilar ekani qayd etilgan. Dastlab uch nafar jabrlanuvchi shifoxonaga yetkazilgan.
Vayronalar ostida qolgan to‘rtinchi ishchini qutqarish chog‘ida minora yana qulab tushgan. Oktay Stroichi ismli ishchi taxminan 12 soatdan so‘ng vayronalar orasidan chiqarilgan, biroq tez yordam mashinasida uning yuragi to‘xtab qolgan. Shifokorlar hayotni saqlab qolishga uringan, ammo natija bo‘lmagan. Ruminiya Tashqi ishlar vazirligi marhumning Ruminiya fuqarosi ekanini tasdiqladi.
Qutqarib olingan ishchilardan birining ahvoli og‘ir ekani aytilmoqda. Voqea joyiga Rim meri Roberto Galteri hamda Italiya madaniyat vaziri Alessandro Juli borib, vaziyat bilan tanishdi. Tergov ishlari Rim prokuraturasi tomonidan boshlangan.
Konti minorasi 1203-yilda Papa Innokentiy III va Senya graflari topshirig‘iga binoan qurilgan bo‘lib, dastlab monastir hududida joylashgan ibodatxonaning o‘rnida turar joy va mudofaa inshooti sifatida barpo etilgan. Ilk balandligi 50 metrdan ortiq bo‘lgan minora keyingi asrlardagi zilzilalar va qayta qurilishlar natijasida qisqargan bo‘lib, hozirda 29 metrga teng.
