O‘zbek shoirining kitobi Qirg‘izistonda nashr etildi
Avvalroq Shuhrat Orifning "Mavi erk" kitobi turk tilida Anqarada chop etilgan edi.
O‘zbekiston Yozuvchilar uyushmasi aʼzosi, shoir Shuhrat Orifning “44-kuz” sheʼriy kitobi Qirg‘izistonning Bishkek shahrida nashrdan chiqdi. “Mukay” nashriyoti tomonidan chop etilgan kitobdagi sheʼrlarni isteʼdodli shoira, Jo‘lon Mamitov nomidagi mukofot sohibi Gulumxan Isayeva qirg‘iz tiliga tarjima qilgan.
Kitobga Qirg‘iziston Yozuvchilar uyushmasi raisi o‘rinbosari, taniqli shoir Atantay Akbarov so‘zboshi yozgan.
Shuhrat Orif o‘zbek adabiyotini xorijda faol targ‘ib qilib kelayotgan ijodkorlardan biri hisoblanadi. Joriy yilning sentyabr oyida shoirning "Mavi erk" kitobi turk tilida Anqarada chop etilgan edi.
Ijodkorning sheʼrlari ingliz, turk, ozarbayjon, qirg‘iz, qozoq, turkman, uyg‘ur tillariga tarjima qilingan.
2025 yilda Shuhrat Orif O‘zbekiston Respublikasi Prezidentining farmoniga asosan “Do‘stlik” ordeni bilan mukofotlandi. Shoirning turkiy xalqlar adabiy aloqalariga qo‘shayotgan hissasi Turkiy madaniyat xalqaro tashkiloti tomonidan eʼtirof etilib, TURKSOY medali bilan taqdirlandi.
