Suriya rahbari AQSHga boradi

 

Suriya prezidenti Ahmad ash-Shara 10-noyabr kuni AQSHga tashrif buyuradi va Donald Tramp bilan uchrashadi. Bu haqda AQSHning Turkiyadagi elchisi, hamda Trampning Livan va Suriya bo‘yicha maslahatchisi Tom Barrak “Axios” nashriga bergan intervyusida maʼlum qildi.

 

Tom Barrakga ko‘ra, ash-Sharaning AQSHga kelishi ikki mamlakat o‘rtasidagi munosabatlarni qayta tiklash yo‘lidagi navbatdagi qadam bo‘ladi.

 

“Axios” maʼlumotlariga ko‘ra, safar davomida al-Shara Suriyaning ISHIDga qarshi kurashayotgan AQSH boshchiligidagi xalqaro koalitsiyaga qo‘shilishi bo‘yicha kelishuv imzolashni rejalashtirgan. 

 

Bundan avval Donald Tramp maʼmuriyati Kongressning Suriya bo‘yicha sanksiyalarni to‘liq bekor qilish to‘g‘risidagi qarorini qo‘llab-quvvatlagan edi.

 

Mazkur sanksiyalar 2020-yil iyun oyida kuchga kirgan “Sezar qonuni” doirasida joriy etilgan bo‘lib, ular Suriya hukumati va u bilan hamkorlik qiluvchi kompaniyalarga — ayniqsa energetika va qurilish sohalarida — nisbatan qo‘llanilgan edi.

 

Tramp maʼmuriyati ilgari bu sanksiyalarni vaqtincha yumshatgan, ammo ularni butunlay bekor qila olmas edi. Chunki bu vakolat faqat Kongress tomonidan tasdiqlanishi kerak.

 

So‘nggi marta Suriya vakili Oq uyga 1999-yil dekabr oyida tashrif buyurgan edi. O‘shanda tashqi ishlar vaziri Faruq ash-Shara Isroil bilan muzokaralarda qatnashgan.

 

Ahmad ash-Sharaning bu safaridan so‘ng AQSH vositachiligida Suriya va Isroil o‘rtasida to‘g‘ridan-to‘g‘ri muzokaralarning beshinchi bosqichi o‘tkazilishi kutilmoqda.

 

Tom Barrakning so‘zlariga ko‘ra, ushbu muzokaralarning maqsadi — yil yakuniga qadar ikki davlat chegarasida xavfsizlik bo‘yicha bitimga erishish maqsad qilingan.