Harbiy oliy ta’lim bitiruvchilari uchun 5 yillik majburiy xizmat tartibi joriy etildi
Xizmatni o‘tamaslik yoki tark etish holatlarida o‘qish xarajatlari davlatga qoplab beriladi.
O‘zbekiston Respublikasi Prezidenti tomonidan oliy harbiy ta’lim muassasalari bitiruvchilarining xizmat o‘tash tartibini belgilovchi qaror imzolandi. Yangi hujjatga ko‘ra, oliy harbiy ta’limni tamomlagan shaxslar kamida besh yil davomida ofitser sifatida harbiy xizmatni o‘tashi shart etib belgilandi.
Bu haqda Adliya vazirligining Huquqiy axborot kanali ma’lum qildi.
Qarorga muvofiq, belgilangan muddatda xizmatni o‘tashdan bosh tortgan yoki xizmatni sababsiz tark etgan bitiruvchilarni tayyorlash uchun sarflangan davlat xarajatlari ular tomonidan qoplab beriladi.
Mazkur tartib ilgari amal qilgan tizimdan farq qiladi. Avval oliy harbiy o‘quv yurtlari bitiruvchilari Qurolli Kuchlar bilan bir qatorda boshqa vazirlik va idoralar tizimida ham xizmatga jalb etilishi mumkin edi. Endilikda esa bitiruvchilarning bevosita harbiy xizmatni o‘tashi majburiy tartibda mustahkamlab qo‘yildi.
