Qamashi tumani respublikada eng past o‘rtacha ish haqi bo‘lgan hudud bo‘ldi
Joriy yilning yanvar-sentyabr oylarida Qamashi tumanida o‘rtacha ish haqi 3 mln so‘mni tashkil etdi.
Joriy yilning yanvar-sentyabr oylarida O‘zbekiston bo‘yicha o‘rtacha oylik ish haqi 6,2 million so‘mni tashkil etdi. Tuman va shaharlar kesimida esa eng yuqori ish haqi Mirobod tumanida (13,1 mln so‘m), eng past ko‘rsatkich esa Qamashi tumanida (3 mln so‘m) qayd etilgan.
Respublikadagi 28 ta tuman (tumanlarning 13,6 foizi) ish haqi o‘rtacha ko‘rsatkichdan yuqori bo‘lsa, qolgan hududlarda o‘rtacha ish haqi 4 mln so‘m atrofida bo‘lgan. Ko‘pchilik hududlarda ish haqi respublikadagi o‘rtacha darajaning 70 foizidan past. Ayniqsa, Amudaryo, Qamashi va Mirishkor tumanlarida ish haqqi respublika o‘rtachasining yarmidan ham kam.
Shu bilan birga, past daromadli tumanlarda o‘sish surʼati yuqori bo‘lib, o‘rtacha ish haqi respublika o‘rtachasidan past hududlarda 18,4 foizga oshgan. O‘rtacha ish haqidan yuqori bo‘lgan hududlarda esa o‘sish 17,5 foizni tashkil qilgan.
