Turkiya Milliy ta’lim vaziri O‘zbekiston bilan ta’lim hamkorligini rivojlantirish va yangi maktablar ochish bo‘yicha muzokaralar o‘tkazdi
Hozirda O‘zbekistonda 50 nafar turk o‘qituvchisi faoliyat yuritmoqda, Toshkentdagi ikki turk maktabida esa jami 693 nafar o‘quvchi tahsil olmoqda.
Turkiya Respublikasi Milliy Ta’lim Vaziri Prof. Dr. Yusuf Tekin UNESCO 43-umumiy yig‘ilishida Turkiya nomidan ishtiroki davomida O‘zbekistonda, xususan, Samarqand va Buxoroda bo‘lish baxtiga muyassar bo‘ldi. Bu ikki shahar nafaqat tarixiy ahamiyatga ega, balki ikki davlat o‘rtasidagi chuqur do‘stlik va birodarlik aloqalarining ramzi hisoblanadi.
O‘rxun yodgorliklaridagi Bilge Xoqon so‘zlari, Navoiy va Abdulhamid Suleymanov Cho’lpon ijodidagi she’rlar o‘zbek-turk birodarligining ming yillik tarixini va bugungi kun aloqalarining qadrini ifodalaydi. Bu ruh, ta’lim, madaniyat va tarbiya orqali mustahkamlanmoqda.
Sayohat davomida Maktabgacha va maktab taʼlimi vaziri Ezazxon Karimova o‘rtasida ikki davlat do‘stligini mustahkamlash, Istanbul va Toshkentdagi maktablar faoliyatini yanada rivojlantirish bo‘yicha samarali muzokaralar o‘tkazildi. Shu bilan birga, ikki mamlakatning ta’lim tizimlari o‘rtasida innovatsion loyihalar, pedagogik kadrlarni tayyorlash, raqamli texnologiyalar va sun’iy intellektni o‘quv jarayonlariga tatbiq etish, o‘quv dasturlari va darsliklar bo‘yicha hamkorlik imkoniyatlari muhokama qilindi.
Ta’lim diplomatiyasi konsepsiyasi doirasida Turkiya va O‘zbekiston o‘rtasida o‘quv muassasalari va dasturlar orqali strategik hamkorlik kengaytirildi. Hozirda O‘zbekistonda 50 nafar turk o‘qituvchisi faoliyat yuritmoqda, Toshkentdagi ikki turk maktabida esa jami 693 nafar o‘quvchi tahsil olmoqda. Shuningdek, 14 ta ta’lim muassasasida turk tilini o‘qitish va madaniyatni o‘rgatish ishlari olib borilmoqda.
2025-yil 1-noyabrda Samarqand shahrida imzolangan protokol ikki mamlakat ta’lim hamkorligini yangi bosqichga olib chiqdi. Shu doirada Toshkentda turk maktabi binosi uchun yer ajratildi, Istanbuldagi Bakirko‘y tumanida esa O‘zbekiston fuqarolari uchun maktab ochish bo‘yicha chora-tadbirlar ko‘rildi. Bu esa ikki davlat o‘rtasidagi ta’lim sohasidagi doimiy va barqaror hamkorlikning namunasidir.
Vazir Prof. Dr. Yusuf Tekin sayohat davomida O‘zbekiston Prezidenti Shavkat Mirziyoyevga, shuningdek, hamkorlik qilgan barcha rasmiylarga va oliy o‘quv yurtlari jamoasiga minnatdorlik bildirdi. Ayniqsa, O‘zbekiston Jurnalistika va Ommaviy Kommunikatsiyalar Universiteti rektori Sherzodxon Qudratxo‘jaga minnatdorlik izhor qilindi.
Ushbu sayohat ikki davlat do‘stligini mustahkamlash va ta’lim diplomatiyasi orqali kelajak avlodlar uchun mustahkam birodarlik aloqalarini yaratish yo‘lida muhim qadamlardan biri bo‘ldi.
