Zohran Mamdani Nyu-York merligi saylovlarida g‘alaba qozondi
34 yoshli siyosatchi Kuomo va Slivani ortda qoldirdi va Nyu-York tarixida ilk musulmon hamda eng yosh mer bo‘ldi.
AQShning Nyu-York shahrida bo‘lib o‘tgan mer saylovlarida demokratlar partiyasi nomzodi Zohran Mamdani g‘olib chiqdi. Bu haqda Associated Press xabar berdi.
34 yoshli Mamdani saylovda mustaqil nomzod Endryu Kuomo hamda Respublikachilar partiyasidan nomzod Kyortis Slivani ortda qoldirdi. U Nyu-York tarixida ushbu lavozimni egallagan birinchi musulmon va eng yosh mer bo‘lib qoladi.
Mamdani saylovoldi dasturida uy-joy ijarasi bozorini tartibga solish, jamoat transporti yo‘nalishidagi avtobus xizmatini bepul qilish hamda bolalarni parvarishlash xizmatlari narxini nazorat ostiga olishni va’da qilgan.
Avvalroq AQSh Prezidenti Donald Tramp o‘z tarafdorlarini Kuomoga ovoz berishga chaqirgan va Mamdani g‘alaba qozongan taqdirda Nyu-Yorkka federal moliyalashtirishni qisqartirish bilan tahdid qilgan edi. Mamdani esa Tramp tomonidan qo‘llab-quvvatlanayotgan nomzodlarni tanqid qilib, bu holat “MAGA harakati manfaatlarini aks ettirishi”ni ta’kidlagan.
Nyu-York Hisob palatasi ma’lumotlariga ko‘ra, shahar yiliga qariyb 7,4 mlrd dollar miqdorida federal mablag‘ oladi, bu esa shahar byudjetining 6,4 foizini tashkil etadi.
