Afg‘onistonda burqasiz ayollarning davlat idoralariga kirishi taqiqlanmoqda
UNAMA ma’lumotiga ko‘ra, ayrim viloyatlarda ayollar shifoxonalarga ham kiritilmayapti.
“Tolibon” harakati tomonidan qabul qilingan yangi tartibga ko‘ra, burqa kiygan ayollargina davlat idoralariga kirish huquqiga ega bo‘lishi belgilandi. Bu haqda Hasht-e Subh Daily nashri manbalarga tayanib xabar berdi.
Ma’lumotlarga ko‘ra, so‘nggi kunlarda bir qator davlat organlarida ayollarning burqasiz holda binoga kirishi cheklangan. Jumladan, Aholini ro‘yxatga olish idorasi, Ta’lim vazirligi hamda Qamoqxonalar bosh boshqarmasi binolarida mazkur taqiq kuzatilgan. Xususan, Hirot viloyatida kamida 50 nafar ayolning viloyat ta’lim boshqarmasiga kirishiga yo‘l qo‘yilmagani bildirilmoqda.
Ayni choralar hozircha Afg‘onistonning bir necha viloyatlarida amaliyotga tatbiq etilgan. Manbalarning qayd etishicha, ushbu qaror ayollarni burqa kiyishga majburlashga qaratilgan.
BMTning Afg‘onistondagi yordam missiyasi (UNAMA) tomonidan taqdim etilgan so‘nggi hisobotda, Kunar, Qandahor va Xost viloyatlarida burqasiz ayollarning shifoxonalarda tibbiy xizmatdan foydalanishi ham cheklangani ta’kidlangan. Shuningdek, tibbiyot muassasalari xodimlariga hijob taqmagan ayol bemorlarni qabul qilmaslik bo‘yicha ogohlantirish berilgan.
Bundan tashqari, ayollarning shifoxona va tibbiyot markazlariga kirishida ham bir qator cheklovlar kuchaytirilgan. Afg‘onistonda qizlarning yuqori sinflarda ta’lim olishi hamda oliy ta’lim muassasalarida o‘qishi taqiqlanib qolmoqda. Akusherlik va hamshiralik yo‘nalishida tahsil olayotgan talabalarga darslarga bormaslik topshirig‘i berilgani oqibatida ularning ta’limni davom ettirish imkoniyati cheklab qo‘yilgan.
