Farg‘onada tadbirkorlarga ajratilgan 1,4 mlrd so‘mlik subsidiya noqonuniy o‘zlashtirilgani aniqlandi

Farg‘ona viloyatida tadbirkorlarni qo‘llab-quvvatlash maqsadida ajratilgan subsidiya mablag‘laridan noqonuniy foydalanish holatlari aniqlangan. Bu haqda Korrupsiyaga qarshi kurashish agentligi maʼlum qildi.

 

O‘rganish Vazirlar Mahkamasining 2023 yil 22 iyuldagi qarori asosida ajratilgan subsidiya mablag‘larining maqsadli sarflanishi yuzasidan o‘tkazilgan. Natijaga ko‘ra, 2023–2024 yillarda ajratilgan jami 9,3 mlrd so‘mlik subsidiya mablag‘larining 1,4 mlrd so‘mdan ortig‘i turli sxemalar orqali o‘zlashtirilgan.

 

Aniqlangan buzilishlar:

 

• Uchko‘prik tumanida ikki korxona 37 nafar kasanachiga yetkazilishi kerak bo‘lgan 309,4 mln so‘mlik uskunalarni bermagan.

 

• Rishton tumanida bir korxona 42 nafar kasanachilar uchun ajratilgan 277,2 mln so‘mni maqsadsiz ishlatgan.

 

• Bog‘dod tumanida ikki korxona 54 nafar kasana chi nomidan 275 mln so‘mni o‘zlashtirgan.

 

• Beshariq tumanida bir korxona 33 nafar fuqaroga tegishli 192,4 mln so‘mlik uskunalarni topshirmagan.

 

• Qo‘qonda bir korxona 17 nafar kasanachiga mo‘ljallangan 160,5 mln so‘mlik uskunalarni yetkazmagan.

 

• Farg‘ona tumani, Farg‘ona shahri va Dang‘ara tumanlarida jami 255,3 mln so‘m talon-toroj qilingan.

 

Shuningdek, 6 nafar fuqaroga ikki marotaba subsidiya ajratilishi natijasida 34,9 mln so‘m asossiz sarflangani, avval subsidiya olgan 47 nafar shaxsga qayta 300,1 mln so‘m ajratilgani aniqlangan.

 

Agentlik nazarida, subsidiya ajratilishi ustidan nazorat qilishi lozim bo‘lgan mahalliy boʼlimlar va masʼul xodimlar tomonidan jiddiy eʼtiborsizlik va huquqbuzarliklarga yo‘l qo‘yilgan.

 

Mazkur holatlar yuzasidan Bosh prokuratura huzuridagi Iqtisodiy jinoyatlarga qarshi kurashish departamenti tomonidan jinoiy ish qo‘zg‘atildi va dastlabki tergov harakatlari olib borilmoqda.