Komil Allamjonov AQSHga o‘zbekistonliklar uchun 10 yillik viza joriy etishni taklif qildi
U buni 2026-yildan AQSH fuqarolari uchun O‘zbekistonda vizasiz tartib joriy etilishi fonida bildirdi.
Prezident Administratsiyasi rahbari yordamchisi Saida Mirziyoyevaning maslahatchisi Komil Allamjonov o‘zbekistonlik fuqarolar uchun AQSH tomonidan 10 yillik vizalar joriy etilishini taklif etdi. Bu haqda Allamjonov 3-noyabr kuni X (sobiq Twitter) platformasidagi sahifasida ma’lum qildi.
U o‘z postida O‘zbekiston Respublikasi prezidentining farmoniga muvofiq, 2026-yil 1-yanvardan boshlab AQSH fuqarolari uchun 30 kungacha vizasiz kirish tartibi joriy etilishini eslatdi. Mazkur yangilikka izoh bildirgan AQSH davlat kotibi birinchi o‘rinbosari Kristofer Landau vizasiz rejimni “Amerikalik sayyohlar uchun keng imkoniyatlar ochuvchi muhim qadam” sifatida baholadi.
Allamjonovning qayd etishicha, u yaqinda Kristofer Landau hamda AQSH prezidentining Janubiy va Markaziy Osiyo masalalari bo‘yicha maxsus vakili Serjio Gor bilan uchrashuvda amerikalik turistlar uchun viza bekor qilinishi masalasini muhokama qilgan. Shu munosabat bilan u B1/B2 toifasidagi vizalar amal qilish muddati o‘zbekistonliklar uchun 1 yildan 10 yilgacha uzaytirilishi ikki davlat o‘rtasidagi aloqalarni yanada mustahkamlashi mumkinligini ta’kidladi.
“Allaqachon muhim qadam tashlandi — O‘zbekiston AQSH fuqarolari uchun ochiq. Endi o‘zbekistonliklarga ham Amerika vizasi muddatini uzaytirish imkoniyati berilsa, bu ikki tomonlama hamkorlikni yanada mustahkamlaydi”, — deya ta’kidladi Allamjonov.
U, shuningdek, Markaziy Osiyo davlatlari va AQSH o‘rtasida hamkorlik salohiyati yuqori ekanini qayd etdi: “Mintaqa va AQSH bir-biriga taklif qiladigan va bir-biridan oladigan foydali imkoniyatlar ko‘p. Muhimi — boshladik, bu jarayonning yo‘lga qo‘yilgani meni quvontiradi”, — dedi Allamjonov.
