Putin Rossiyada yadroviy sinovlarga tayyorgarlik ko‘rishni topshirdi
Ushbu topshiriq Trampning yadroviy sinovlarni tiklash haqidagi bayonotidan so‘ng berildi.
Kreml ma’lumotiga ko‘ra, Vladimir Putin Tashqi ishlar vazirligi, Mudofaa vazirligi hamda tegishli idoralarga yadroviy qurollarni sinovdan o‘tkazish imkoniyatlarini o‘rganish bo‘yicha topshiriq berdi. Mazkur ko‘rsatma AQSh prezidenti Donald Trampning yadroviy sinovlarni qayta boshlash haqidagi bayonotidan so‘ng berilgani ta’kidlanmoqda.
Putin masala bo‘yicha takliflar ishlab chiqilib, Xavfsizlik kengashida muhokama qilinishini so‘radi. Mudofaa vaziri hamda Bosh shtab rahbari yadroviy sinovlarga tayyorgarlik ko‘rish ishlarini tez fursatda boshlash zarurligini bildirgan. Dastlabki ma’lumotlarga ko‘ra, sinovlar qisqa muddat ichida Novaya Zemlya hududida amalga oshirilishi ehtimoli mavjud.
Mutaxassislar yadroviy sinovlarning qayta boshlanishi global xavfsizlik muvozanatiga jiddiy tahdid solishi, shuningdek, boshqa yadroviy davlatlar tomonidan ham shunga o‘xshash choralarning ko‘rilishiga sabab bo‘lishi mumkinligini qayd etmoqda.
Kreml vakili Dmitriy Peskovning aytishicha, mazkur jarayonlar bo‘yicha aniq muddat belgilanmagan. Qaror AQShning ushbu boradagi rejalari to‘liq o‘rganilgandan keyin qabul qilinishi kutilmoqda.
