Qozog‘iston va AQSh strategik xomashyo sohasida hamkorlik memorandumi imzoladi
Hujjat Prezident Qosim-Jomart To‘qayev tashrifi chog‘ida Vashingtonda imzolandi.
Qozog‘iston va AQSh o‘rtasida muhim xomashyo (critical minerals) sohasida hamkorlikni kengaytirishga qaratilgan anglashuv memorandumi imzolandi. Bu haqda QazInform axborot agentligi xabar berdi.
Hujjat Vashingtonda bo‘lib o‘tgan marosimda Qozog‘iston Respublikasi Prezidenti Qosim-Jomart To‘qayev ishtirokida imzolangan. Memorandumga Qozog‘iston sanoat va qurilish vaziri Ersaiyn Nagaspayev hamda AQSh savdo kotibi Howard Lutnick imzo chekti.
Ma’lum qilinishicha, hujjat ikki davlat o‘rtasida qimmatbaho yer elementlari va strategik resurslarni izlash, qazib olish, qayta ishlash, shuningdek, texnologik hamkorlik va qo‘shma investitsiya loyihalarini yo‘lga qo‘yishni nazarda tutadi.
Prezident To‘qayev tashrifi doirasida AQSh davlat kotibi Marco Rubio hamda Donald Tramp ma’muriyatining boshqa vakillari bilan uchrashuvlar o‘tkazdi. Muzokaralarda iqtisodiy hamkorlikni chuqurlashtirish va transport hamda energetika sohalarida qo‘shma tashabbuslarni amalga oshirish masalalari muhokama qilindi.
