Samarqandda YUNESKOning yangi bosh direktori saylandi
U 15 noyabr kuni to‘rt yillik muddatga o‘z lavozimiga kirishadi.
Bugun, 6-noyabr kuni YUNESKO Bosh konferensiyasi tashkilotning yangi bosh direktori etib misrlik Xolid al-Enaniyni sayladi. Bu haqida “Dunyo” axborot agentligi xabar bermoqda.
Qayd etilishicha, YUNESKOning 12-bosh direktori bo‘lgan Xolid al-Enani 174 ta byulletendan 172 tasini olgan. U 15 noyabr kuni to‘rt yillik muddatga o‘z lavozimiga kirishadi.
Qayd etilishicha, u tashkilotning arab mamlakatidan bo‘lgan birinchi rahbari va Afrikaning ikkinchi vakili hisoblanadi.
Xolid Ahmad El-Enaniy Ali Ezz 1971 yilda tug‘ilgan. U taniqli misrshunos va Xeluan universitetining misrshunoslik professori bo‘lib, u yerda 30 yildan ortiq vaqt davomida dars berib kelmoqda.
2014-2016 yillarda Misr sivilizatsiyasi milliy muzeyi, shuningdek, Qohiradagi Misr muzeyini boshqargan. 2016 yildan 2022 yilgacha u Misrning qadimiy yodgorliklar vaziri, keyin esa turizm va qadimiy yodgorliklar vaziri lavozimlarida ishlagan. 2024 yil noyabr oyida Jahon sayyohlik tashkiloti uni madaniy turizm bo‘yicha maxsus elchi etib tayinladi va keyinchalik u Afrika Jahon merosi jamg‘armasining homiysiga aylandi.
Al-Enaniy bir qator xalqaro ilmiy jamiyatlar aʼzosi, arab, fransuz va ingliz tillarini biladi va bir nechta xalqaro mukofotlarga sazovor bo‘lgan.
U bu lavozimda 2017 yildan beri YUNESKOga rahbarlik qilib kelgan Odri Azule o‘rnini egalladi.
