Toshkent aeroportida “Umra ziyoratchisi” ushlandi
U noqonuniy dori vositalarini olib o‘tmoqchi bo‘lgan.
Toshkent xalqaro aeroportida bojxona xodimlari tomonidan dori vositalarini noqonuniy yo‘l bilan olib o‘tishning o‘zgacha usuli fosh etildi. Xorijdan kelgan yo‘lovchi umumiy qabul qilish zalida “yashil yo‘lak”dan o‘tmoqchi bo‘lgan va o‘zini umradan qaytgan ziyoratchi sifatida ko‘rsatgan. Bu haqda “Toshkent-Aero” ixtisoslashtirilgan bojxona kompleksi matbuot xizmati xabar berdi.
Yo‘lovchining asabiy harakatlari bojxona inspektorlarining e’tiborini tortgan. Shundan so‘ng uning yuki qo‘shimcha ko‘rikdan o‘tkazildi. Tekshiruv jarayonida mazkur shaxs Saudiya Arabistonidan emas, aslida Dehlidan uchib kelgani aniqlangan.
Ko‘rik davomida uning bagajidan turli nom va markadagi 1 798 dona dori vositasi topilgan. Ushbu mahsulotlarning umumiy qiymati 204 million so‘mdan ortiq ekanligi ma’lum bo‘ldi. Yo‘lovchi dori vositalarining kelib chiqishi, sifati yoki mamlakatga olib kirilishiga ruxsat beruvchi hech qanday hujjatni taqdim eta olmagan.
Mazkur holat yuzasidan tergovga qadar tekshiruv ishlari boshlangan bo‘lib, shaxsning noqonuniy faoliyatga aloqadorligi hamda dori vositalari qayerdan va qanday maqsadda olib kirilgani yuzasidan surishtiruv davom etmoqda.
