Toshkent Osiyoda 2026-yilda sayohat uchun eng yaxshi manzillar ro‘yxatiga kiritildi
Dunyoga mashhur “Condé Nast Traveler” xalqaro sayyohlik nashri “2026-yilda Osiyoda sayohat qilish uchun eng yaxshi joylar” reytingini e’lon qildi.
Toshkent shahri dunyoga mashhur “Condé Nast Traveler” xalqaro sayyohlik nashri tomonidan e’lon qilingan “2026-yilda Osiyoda sayohat qilish uchun eng yaxshi joylar” ro‘yxatidan o‘rin oldi.
Reytingda qayd etilishicha, poytaxt o‘zining qadimiy tarixiy merosi va zamonaviy shahar muhitining uyg‘unlashuvi bilan sayyohlar uchun jozibador manzilga aylanmoqda. Bu yerda qadimiy madrasalar, bozorlar va tarixiy obidalar zamonaviy madaniy maydonlar bilan yonma-yon mavjud bo‘lib, mehmonlarga o‘ziga xos tajriba taqdim etadi.
Nashr Toshkentning Markaziy Osiyoda madaniy turizm markaziga aylanish jarayoni jadallashayotganini ta’kidladi. Jumladan, “Islom sivilizatsiyasi markazi” majmuasi hamda “Zamonaviy san’at markazi” faoliyatining yo‘lga qo‘yilishi shaharga tashrif buyuruvchilarga boy tarixiy meros va zamonaviy san’at bilan bir vaqtning o‘zida tanishish imkonini bermoqda. Bu esa poytaxtni iste’dodlar, madaniyat va zamonaviy badiiy hayot chorrahasiga aylantiradi.
Bugungi kunda Toshkent nafaqat O‘zbekistonning sayyohlik yo‘nalishlariga kirish darvozasi, balki mustaqil ravishda alohida kashf etilishi lozim bo‘lgan zamonaviy turizm maskani sifatida ham e’tirof etilmoqda. Shaharda boy madaniy dasturlar, tarixiy ekskursiyalar, san’at tadbirlari va betakror shahar muhiti sayohatchilar uchun unutilmas taassurotlar baxsh etadi.
