Uch nafar xitoylik astronavt orbitada qolib ketdi
Maʼlum bo‘lishicha, ulaning kosmik kapsulasi shikastlangan.
Xitoyning Shenzhou-20 kosmik missiyasi doirasida Tiangong orbital stansiyasida xizmat qilayotgan uch nafar astronavtning Yerga qaytishi nomaʼlum muddatga kechiktirildi. Rasmiy maʼlumotlarga ko‘ra, ularni qayta olib kelishi kerak bo‘lgan qaytish kapsulasi kosmik chiqindilar bilan to‘qnashgan bo‘lishi ehtimoli bor. Shu sababdan xavfsizlik chorasi sifatida astronavtlar hozircha stansiyada qolmoqda.
Kapsula yuzasida shikastlanish ehtimoli aniqlangach, parvoz boshqaruv markazi qo‘shimcha texnik diagnostika o‘tkazish, issiqlikdan himoya qoplamasi va qaytish tizimlarining ishonchliligini qayta baholashga qaror qilgan.
Astronavtlar — Chen Dun, Chen Junjuy va Van Sze — stansiyadagi vazifalarini davom ettirmoqdalar. Ularning hayoti yoki sog‘lig‘i uchun hozircha bevosita xavf yo‘qligi maʼlum qilingan.
Mutaxassislarning taʼkidlashicha, orbitadagi eng katta muammolardan biri — kosmik chiqindilardir. Sputniklar parchalari, raketa bo‘laklari, buzilgan qurilmalar qoldiqlari va hatto millimetr o‘lchamdagi metall qismichalar ham ulkan tezlikda harakat qiladi va apparatga urilishi oqibatida qoplamani teshib o‘tishi yoki issiqlik himoyasini izdan chiqarishi mumkin.
