Yevropa Ittifoqi Rossiya fuqarolari uchun ko‘p martalik Shengen vizalarini taqiqlashi mumkin
Qaror qabul qilinsa, rossiyaliklarga faqat bir martalik vizalar beriladi.
Yevropa Ittifoqi rasmiylari Rossiya fuqarolariga ko‘p martalik Shengen vizalarini berishni taqiqlash masalasini joriy hafta ko‘rib chiqmoqda. Bu haqda Politico nashri 5-noyabr kuni Yevropa Ittifoqining uch nafar rasmiysiga tayanib xabar berdi deydi dw.com nashri.
Loyiha qabul qilinsa, rossiyaliklar faqat bir martalik (yagona safar uchun) Shengen vizalarini olishlari mumkin bo‘ladi. Gumanitar sabablarga ko‘ra Yevropaga kelishni rejalashtirganlar, shuningdek, Yevropa Ittifoqi davlatlaridan birining fuqarosi bo‘lgan shaxslar uchun istisnolar ko‘zda tutilmoqda.
Ma’lumotlarga ko‘ra, ushbu chorani joriy etish taklifi Ukrainadagi urush bilan bog‘liq bo‘lib, Rossiya uchun navbatdagi sanksiya sifatida ilgari surilmoqda. Biroq, nashr qayd etishicha, viza berish bo‘yicha yakuniy qaror har bir davlat hukumatining vakolatiga kiradi. Shu bois, YeI viza talablari bo‘yicha umumiy qoidalarni qat’iylashtirishi mumkin bo‘lsa-da, ularni to‘liq taqiqlash to‘g‘risida yakka tartibda qaror qabul qila olmaydi.
Avvalgi cheklovlar
2022-yil sentabr oyida, Ukrainada keng ko‘lamli harbiy harakatlar boshlanganidan so‘ng, Yevropa Ittifoqi Rossiya bilan soddalashtirilgan viza tartibini bekor qilgan, viza to‘lovini 35 yevrodan 80–90 yevrogacha oshirgan hamda arizalarni ko‘rib chiqish muddatini uzaytirgan edi. Shuningdek, Polsha, Latviya, Litva, Estoniya va Chexiya kabi bir qator Yevropa davlatlari rossiyaliklarga sayyohlik vizalarini berishni to‘xtatgan.
Mazkur choralar va boshqa sanksiyalar natijasida Yevropa Ittifoqiga safar qilayotgan Rossiya fuqarolari soni keskin kamaygan. 2021-yilda YeIga 4 milliondan ortiq rossiyalik tashrif buyurgan bo‘lsa, bu ko‘rsatkich 2023-yilda 517 ming, 2024-yilda esa 541 mingni tashkil etgan.
2024-yilda rossiyaliklarga berilgan Shengen vizalarining katta qismi janubiy Yevropa davlatlariga to‘g‘ri kelgan: Italiya — 152 mingdan ortiq, Fransiya — 124 ming, Ispaniya — 111 ming hamda Gretsiya — qariyb 60 ming viza bergan. Politico ma’lumotiga ko‘ra, Vengriya ham viza berish bo‘yicha yetakchi davlatlar safida.
