Zangiotada egasi noma'lum 5 kilogramm narkotik modda topildi
Hozirda giyohvand moddalarni yashirgan shaxslarni aniqlash bo‘yicha tezkor chora-tadbirlar olib borilmoqda.
Giyohvandlik vositalarining noqonuniy savdosi va iste’moli jamiyat salomatligiga, yoshlar taqdiriga hamda mamlakat taraqqiyotiga jiddiy tahdid solishda davom etmoqda. Ushbu xavfli illatga qarshi keskin choralar ko‘rish davlat siyosatining ustuvor yo‘nalishlaridan biridir.
Davlat xavfsizlik xizmati tomonidan Ichki ishlar va Bojxona organlari bilan hamkorlikda o‘tkazilgan tezkor tadbirlar natijasida yirik hajmdagi giyohvandlik vositalarining noqonuniy aylanishi fosh etildi.
Xususan, Toshkent viloyati Zangiota tumani hududidan o‘tuvchi Toshkent katta halqa avtomobil yo‘li yaqinidagi yashirilgan joydan giyohvand modda topildi. Tekshiruv jarayonida ilgari narkokurerlar tomonidan qoldirilgan 10 dona o‘ramda, jami 4 kilogramm 956 gramm “opiy” moddasining borligi aniqlanib, holislar ishtirokida protsessual tartibda rasmiylashtirildi.
Mazkur holat yuzasidan O‘zbekiston Respublikasi Jinoyat kodeksining 273-moddasi 5-qismi bilan jinoyat ishi qo‘zg‘atildi. Hozirda giyohvand moddalarni yashirgan shaxslarni aniqlash bo‘yicha zarur tergov va tezkor chora-tadbirlar olib borilmoqda.
