10 dan ortiq fuqaroni aldab pulini o‘zlashtirgan 20 yoshli yigit Turkiyada ushlandi
Kiberfiribgar O‘zbekiston va Turkiya hamkorligida qo‘lga olinib, deportatsiya qilindi.
Turkiya va O‘zbekiston Ichki ishlar vazirliklari hamkorligida amalga oshirilgan kompleks tezkor-qidiruv tadbirlari natijasida kiberfiribgarlik jinoyatlarida gumonlanib qidiruvda bo‘lgan fuqaro Zohirjonov Umid Dilshod o‘g‘li (2005 y.t.) aniqlanib, O‘zbekiston Respublikasi hududiga deportatsiya qilindi.
Mazkur shaxs ilgari internet orqali turli firibgarlik sxemalarini amalga oshirib, 10 nafardan ortiq O‘zbekiston fuqarosining pullarini noqonuniy ravishda o‘zlashtirganlikda ayblanmoqda.
Uning noqonuniy xatti-harakatlari oqibatida jabrlangan fuqarolar O‘zbekiston Respublikasi Ichki ishlar vazirligiga, uning hududiy bo‘linmalariga yoki O‘zbekistonning Istanbul shahridagi Bosh konsulxonasiga murojaat qilishlari mumkin.
Ta’kidlaymiz, jinoiy javobgarlikdan qochib xorijiy davlatlarda, jumladan Turkiyada yashirinayotgan shaxslarga nisbatan jinoiy ta’qib qat’iy va izchil davom ettiriladi.
