Bojxona nazoratida yangi tartiblar joriy etildi
Vazirlar Mahkamasi bojxona sohasida tartib-taomillarni soddalashtirish va takomillashtirishga qaratilgan qaror qabul qildi.
Vazirlar Mahkamasining 2025-yil 6-noyabrdagi qarori bilan bojxona nazorati shakllari yagona hujjatga birlashtirildi. Endi hujjatlar va ma’lumotlarni tekshirish, bojxona ko‘zdan kechiruvi, shaxsiy ko‘rik va transport vositalarini inventarizatsiyadan o‘tkazish kabi jarayonlar aniq tartibga solindi. Shu bilan birga, deklarantlar tomonidan tovarlarni ko‘zdan kechirish imkoniyati ham rasmiylashtirildi.
Yangi qaror bilan ilgari normativ-huquqiy hujjatlarda mavjud bo‘lmagan tartibotlar ham belgilandi. Masalan, texnik xodimlar, xizmat itlari va texnik vositalardan foydalanish, tovarlarni qayta yuklash jarayonida nazorat o‘rnatish, shuningdek, chekka bojxona postlarida kuchaytirilgan nazorat tizimi endi rasmiylashtirilgan. Bojxona auditi va vakolatli idoralarni xabardor qilish tartibi ham aniq ko‘rsatib o‘tilgan.
Xalqaro pochta va kuryerlik jo‘natmalarini rasmiylashtirish tartibida ham yangiliklar kiritildi. Endi xavflarni boshqarish tizimi orqali pochta jo‘natmalarini nazorat qilish, elektron tijoratdagi tovarlarni eksportga rasmiylashtirish va jo‘natmalar deklaratsiyasi tushunchalari tartibga solindi. Bu o‘zgarishlar xalqaro savdo va onlayn savdoni soddalashtirishga xizmat qiladi.
Shuningdek, bojxona postlarida transport nazorati axborot tizimlari orqali amalga oshiriladi, vaqtincha olib kirilayotgan tovarlar uchun bojxona imtiyozlari muddati va shartlari belgilandi. Elektron deklaratsiyalash tartibotlari takomillashtirildi va sariq yo‘lakda ekspertiza o‘tkazish huquqi berildi. Chegara bojxona postlarida ikki yo‘lakli tizimni qo‘llash tartibi ham amaliyotga joriy etildi.
