Indoneziyada juma namozi payti portlash yuz berdi
Hodisa oqibatida 50 dan ortiq odam jarohatlangan.
Indoneziya poytaxti Jakartada joylashgan maktab masjidida juma namozi chog‘ida yuz bergan portlash oqibatida kamida 50 dan ortiq kishi jarohat oldi. Bu haqida mahalliy rasmiylar va favqulodda xizmatlar xabar bermoqda.
Hodisa Jakarta shimolidagi Kelapa Gading hududida joylashgan 27-son davlat o‘rta maktabining masjidida sodir bo‘lgan. Voqea chog‘ida masjidda asosan o‘quvchilar bo‘lgani sababli jarohatlanganlarning ko‘pchiligi o‘smir yoshidagilar.
Dastlabki ma’lumotlarga ko‘ra, portlash masjiddagi ovoz kuchaytirgich tizimi yonida yuz bergan bo‘lishi mumkin. Ammo rasmiylar voqeaga nima sabab bo‘lganini hali aniq aytmayapti — portlovchi moslama qo‘llanilgani yoki elektr tizimida nosozlik bo‘lgani yuzasidan tekshiruv olib borilmoqda.
Portlashdan so‘ng voqea joyiga tez yordam mashinalari yetib kelgan, jabrlanganlar yaqin atrofdagi shifoxonalarga yetkazilgan.
Politsiya hodisa yuzasidan tergov boshlanganini, xavfsizlik kameralari yozuvlari o‘rganilayotgani va guvohlar bilan suhbat o‘tkazilayotganini bildirdi.
