O‘zbekiston va Ozarbayjon jinoyatlarga oid mobil qurilmalar bo‘yicha ma’lumot almashadi
Ikki davlat o‘g‘irlangan va klonlangan telefonlar bo‘yicha yagona axborot tizimini joriy etadi.
O‘zbekiston va Ozarbayjon hukumatlari o‘rtasida klonlangan, o‘g‘irlangan, yo‘qolgan yoki jinoyat faoliyati bilan bog‘liq mobil qurilmalar haqida axborot almashish bo‘yicha bitim tasdiqlandi. Bu haqda Adliya vazirligi ma’lum qildi. Shunga muvofiq, ikki davlat huquq-niyat organlari endi jinoyatda ishlatilgan yoki noqonuniy ravishda qo‘lga kiritilgan mobil qurilmalarni aniqlashda o‘zaro ma’lumot olish imkoniga ega bo‘ladi.
Bitimni amalga oshirish uchun mas’ul organ etib Raqamli texnologiyalar vazirligi belgilandi. Mazkur tizim ishga tushirilgach, davlatlar o‘rtasida IMEI-kodlar, qurilma egasi to‘g‘risidagi ma’lumotlar va jinoyat sabablari bo‘yicha tezkor ma’lumot almashinuvi yo‘lga qo‘yiladi. Bu esa noqonuniy sotuvlar, “qora bozor” va jinoyat tarmoqlarini aniqlashda muhim vosita bo‘lishi kutilmoqda.
Shuningdek, bitim kuchga kirgach, Vazirlar Mahkamasi hamda tegishli idoralar uning ijrosi ustidan monitoring va nazoratni ta’minlaydi. Mazkur hamkorlik jinoyatchilikka qarshi kurashda, ayniqsa, transchegaraviy mobil aloqa vositalari bilan bog‘liq jinoyatlarni kamaytirishda muhim ahamiyatga ega.
Avvalroq, 19-may kuni O‘zbekiston va Ozarbayjon o‘rtasida ittifoqchilik munosabatlari to‘g‘risidagi shartnoma ratifikatsiya qilingan edi. Ushbu hujjat ikki davlat o‘rtasidagi siyosiy, iqtisodiy va xavfsizlik sohasidagi strategik hamkorlikni chuqurlashtirish, o‘zaro qo‘llab-quvvatlash va mustaqillik hamda hududiy yaxlitlikni hurmat qilish tamoyillariga asoslanadi.
