O‘zbekistonda bog‘chalar soni 38 mingdan oshdi
Maktabgacha ta’lim tizimida o‘sish kuzatilmoqda.
Milliy statistika qo‘mitasining ma’lumotiga ko‘ra, 2024-yil yakuni bo‘yicha O‘zbekistonda faoliyat yuritayotgan maktabgacha ta’lim tashkilotlari soni 38 058 taga yetdi. Bu ko‘rsatkich 2023-yilga nisbatan 2 085 taga ko‘p bo‘lib, mamlakatda bog‘chalar tarmog‘ining izchil kengayib borayotganini anglatadi.
Mamlakat bo‘ylab bog‘chalarning katta qismini — 28 729 tasini oilaviy nodavlat maktabgacha ta’lim tashkilotlari tashkil etadi. So‘nggi yillarda bunday muassasalarga qo‘shimcha qulayliklar yaratilishi va xususiy sektorni qo‘llab-quvvatlash bo‘yicha islohotlar natija bermoqda.
Hududlar kesimida eng ko‘p bog‘chalar Samarqand (4 507 ta), Andijon (4 324 ta), Qashqadaryo (4 216 ta) va Farg‘ona (4 189 ta) viloyatlarida faoliyat yuritmoqda. Eng kam ko‘rsatkich esa Toshkent shahri (1 047 ta) va Sirdaryo viloyatida (1 145 ta) qayd etilgan.
Mutaxassislar fikriga ko‘ra, bog‘chalar sonining ko‘payishi bolalarning erta rivojlanishi va sifatli ta’lim olishini ta’minlash bilan birga, ota-onalarning mehnat bozorida faol ishtirok etishiga ham yordam bermoqda. Shu bilan birga, sifat nazorati va tarbiyachilar malakasini oshirish asosiy vazifalardan biri bo‘lib qolmoqda.
