O‘zbekistonda xususiy tibbiyot sektori ulushi 30 foizga yetdi
9 mingdan ortiq xususiy klinikalar aholiga xizmat ko‘rsatmoqda.
O‘zbekistonda aholiga ko‘rsatilayotgan tibbiy xizmatlarda xususiy sektor ulushi 30 foizga yetdi, deya xabar qilmoqda Sog‘liqni saqlash vazirligi. Jumladan, oftal’mologiya va operativ oftal’mologiya xizmatlarining 60 foizi, LOR va endoskopik LOR xizmatlarining 70 foizi, stomatologik tashxis va muolajalarning esa 91 foizi xususiy klinikalar tomonidan taqdim etilmoqda. Shuningdek, laboratoriya xizmatlarining 40 foizi ham xususiy sektor hissasiga to‘g‘ri keladi.
2017 yilda xususiy shifoxonalar soni taxminan 3,5 mingni tashkil etgan bo‘lsa, bugungi kunda ular 9 mingdan oshgan. Natijada, sakkiz yil ichida xususiy sektorning barcha turdagi tibbiy xizmatlardagi ulushi 10 foizdan 30 foizga ko‘tarilgan. Shu davrda xususiy klinikalarning o‘rni, ayniqsa, Toshkent, Samarqand va Farg‘ona kabi yirik shahar va viloyat markazlarida sezilarli darajada oshgan.
Vazirlik ta’kidlashicha, sohada litsenziyalash va akkreditatsiya tizimi joriy etilgan, tibbiyot tashkilotlarini akkreditatsiya qilish bo‘yicha Milliy standartlar tasdiqlangan. Shu bilan birga, xususiy sektor mutaxassislarining malakasini oshirish tizimi ham amaliyotga kiritilgan. Bu esa xizmat sifatini yaxshilash va aholiga xavfsiz, zamonaviy tibbiy yordam ko‘rsatishga imkon yaratadi.
Kelajakda chegara hududlarda klinika, reabilitatsiya markazi, mehmonxona va laboratoriyalarni o‘z ichiga olgan tibbiyot klasterlarini tashkil etish rejalashtirilgan. Mutaxassislar fikricha, bunday klasterlar aholiga qulaylik yaratib, tibbiy xizmatlarning mintaqaviy teng taqsimlanishini ta’minlaydi va xususiy sektorning rivojlanishiga katta turtki beradi.
