Qashqadaryoda Nexia va Cobalt to‘qnashuvi oqibatida bir kishi halok bo‘ldi
Hodisa yuzasidan jinoyat ishi qo‘zg‘atildi.
7 noyabr kuni soat taxminan 17:20 da Qashqadaryo viloyatining Guzor tumani hududidan o‘tuvchi M-39 “Toshkent–Termiz” avtomobil yo‘lida yo‘l-transport hodisasi sodir bo‘ldi. Dastlabki ma’lumotlarga ko‘ra, Nexia-2 va Cobalt ishtirokida yuz bergan to‘qnashuvda bir yo‘lovchi og‘ir tan jarohatlari oqibatida voqea joyida vafot etgan.
Hodisa natijasida yana ikki nafar fuqaro tan jarohatlari bilan tuman tibbiyot bo‘limiga murojaat qilgan. Ularning ahvoli bo‘yicha tibbiy yordam ko‘rsatilmoqda. Rasmiylar hodisa sabablariga oid dastlabki tafsilotlarni aniqlash ishlarini davom ettirmoqda.
Mazkur voqea yuzasidan Guzor tumani IIB tergov bo‘limi tomonidan Jinoyat kodeksining 266-moddasi (Transport vositalari harakati yoki ulardan foydalanish qoidalarini buzish) bo‘yicha jinoyat ishi qo‘zg‘atildi. Hozirda tergov harakatlari olib borilmoqda.
Shu bilan birga, yo‘l harakati xavfsizligi xizmati ayrim kanallarda tarqalgan “hodisada to‘qqiz kishi halok bo‘lgan” haqidagi xabarlarni rad etdi va rasmiy tasdiqlangan ma’lumotlarga amal qilishni so‘radi.
