Qozog‘istonlik o‘qituvchilar ChatGPT pullik modellaridan bepul foydalanadi
Sun’iy intellekt ta’lim tizimida innovatsiyalarni rivojlantirishga yordam berishi aytilmoq.
Qozog‘iston Respublikasi Sun’iy intellekt va raqamli rivojlanish vazirligi xabariga ko‘ra, mamlakat hukumati OpenAI kompaniyasi bilan ta’lim tizimida sun’iy intellekt texnologiyalarini joriy etish bo‘yicha memorandum imzoladi. Hujjat Vashington shahrida bo‘lib o‘tgan uchrashuvda tasdiqlangan.
Memorandumga ko‘ra, Qozog‘iston o‘qituvchilariga uch yil davomida har yili kamida 165 mingta ChatGPT Edu litsenziyasi taqdim etiladi. Ushbu maxsus Edu versiyasi ta’lim muassasalari uchun mo‘ljallangan bo‘lib, o‘qitish jarayonini optimallashtirish va o‘quvchilarning ta’lim sifatiga ijobiy ta’sir ko‘rsatishga xizmat qiladi.
Tashabbusning asosiy maqsadi — ta’limda innovatsion yondashuvlarni kengaytirish, ma’muriy yukni kamaytirish va o‘qituvchilar vaqtini samarali taqsimlashdir. Shu orqali o‘qituvchilar o‘quv jarayoniga ko‘proq e’tibor qaratishi, talabalarning rivojlanishini yaxshilashi kutilmoqda.
OpenAI vakili Kevin Millsning so‘zlariga ko‘ra, dunyo bo‘ylab o‘qituvchilar allaqachon sun’iy intellektdan foydalangan holda ma’muriy vazifalarni kamaytirib, o‘quvchilarga ko‘proq vaqt ajratmoqda. Qozog‘iston hukumati bilan tuzilgan kelishuv esa mahalliy o‘qituvchilarga ChatGPT’dan samarali foydalanish va uning afzalliklarini butun mamlakat ta’lim tizimiga joriy etish imkonini beradi.
