Uzbekistan Airways yana 8 ta Boeing 787 Dreamliner samolyotiga buyurtmani tasdiqladi
Buyurtma qiymati oshgan holda milliy aviakompaniya parki 2031-yildan boshlab 22 ta Dreamliner bilan to‘ldiriladi.
Boeing kompaniyasi Uzbekistan Airways bilan ilgari 8 ta Boeing 787−9 Dreamliner uchun mavjud bo‘lgan opsion shartnomasi endilikda qat’iy buyurtmaga aylantirilganini ma’lum qildi. Shunday qilib, milliy aviatashuvchining umumiy buyurtmalari soni 22 taga yetdi. Samolyotlarni yetkazib berish 2031-yildan boshlanishi rejalashtirilgan.
Shartnomani tasdiqlash marosimi Vashingtonda bo‘lib o‘tayotgan C5+1 sammiti doirasida AQSH savdo vaziri Xovard Latnik va O‘zbekiston investitsiyalar, sanoat va savdo vaziri Laziz Qudratov ishtirokida amalga oshirildi.
Boeing kompaniyasi yangi 787−9 modeli Uzbekistan Airways’ga xalqaro yo‘nalishlar tarmog‘ini kengaytirish va parvoz samaradorligini oshirishga xizmat qilishini ta’kidladi.
Eslatib o‘tamiz, avvalroq Uzbekistan Airways 14 ta 787−9 Dreamliner xaridi bo‘yicha bitim imzolagani, yana 8 tasi esa opsion sifatida belgilangan edi. Endilikda opsion ham asosiy buyurtmaga o‘tdi.
