Andijonda voyaga yetmagan qizlar o‘rtasida janjal yuz berdi
Shaxsiy kelishmovchilik oqibatida bir guruh qizlar tanishini kaltaklab tan jarohati yetkazgan.
Ijtimoiy tarmoqlarda Andijon shahrida voyaga yetmagan qizlar o‘rtasidagi janjal aks etgan videolavhalar tarqaldi. Unda bir guruh qizlar boshqa bir qizni urib, unga tan jarohati yetkazayotgani tasvirlangan. Mazkur holat yuzasidan Andijon viloyati IIB rasmiy ma’lumot berdi.
Qayd etilishicha, voqea 2025-yil 7-noyabr kuni Andijon shahrining Mustaqillik mahallasi hududida sodir bo‘lgan. Shaxsiy kelishmovchilik tufayli voyaga yetmagan qizlar o‘rtasida janjal kelib chiqqan. Mojaro vaqtida Y.D yonida bo‘lgan uch nafar dugonasi ham jarayonga aralashib, birgalikda E.M.ga tan jarohati yetkazgan.
Hodisa bo‘yicha dastlabki tergov harakatlari boshlangan bo‘lib, holatning barcha jihatlari aniqlanmoqda.
Shuningdek, voyaga yetmaganlarning ota-onasiga nisbatan Ma’muriy javobgarlik to‘g‘risidagi kodeksning 47-moddasi (bola tarbiyasi va ta’limi bo‘yicha majburiyatlarni bajarmaslik) asosida ma’muriy bayonnoma rasmiylashtirilgan. Ular 1 baravardan 5 baravargacha BHM miqdorida — 412 ming so‘mdan 2 mln so‘mgacha jarimaga tortilishi mumkin.
