Andijonda YPX patrul mashinasi ishtirokida YTH sodir bo‘ldi
Tezlikni oshirgan Nexia haydovchisi boshqaruvni yo‘qotib, yo‘l chetida navbatchilik qilayotgan patrul avtomobiliga urilgan.
Ijtimoiy tarmoqlarda Andijon viloyatida Yo‘l-patrul xizmati (YPX) avtomobili ishtirokida sodir bo‘lgan YTH aks etgan videolavhalar tarqaldi. Yo‘l harakati xavfsizligi xizmati mazkur holat yuzasidan rasmiy ma’lumot berdi.
Qayd etilishicha, hodisa 7-noyabr kuni soat 14:15 larda Oltinko‘l tumanidagi Uyshin mahallasi hududidan o‘tuvchi Farg‘ona halqa yo‘lining 142-kilometrida sodir bo‘lgan. YPXning Lacetti rusumli patrul avtomobili yo‘l chetida navbatchilik tartibida xizmat olib borayotgan bo‘lgan.
Shu vaqtda Oltinko‘l–Andijon yo‘nalishi bo‘ylab harakatlangan Nexia rusumli avtomobil haydovchisi tezlikni oshirgan holda boshqaruvni yo‘qotib, patrul avtomobiliga urilgan.
Hodisa oqibatida tan jarohati olganlar qayd etilmagan, biroq transport vositalariga texnik zarar yetgan. Ayni paytda voqea bo‘yicha tegishli tartibda surishtiruv ishlari olib borilmoqda, holat yuzasidan huquqiy baho beriladi.
