O‘zbekistonda mehnat migrantlari uchun ixtiyoriy sug‘urta tizimi joriy etilishi mumkin
Chet elga ishlashga ketayotgan o‘zbekistonliklar endi qo‘shimcha sug‘urta orqali himoyalanadi.
O‘zbekiston xalqaro mehnat migratsiyasiga chiqayotgan fuqarolarni himoya qilishni kuchaytirish maqsadida yangi ixtiyoriy sug‘urta mexanizmini joriy etishni taklif qilmoqda. Hujjat loyihasi Normativ-huquqiy hujjatlar muhokamasi portaliga joylashtirildi.
Migratsiya agentligi tomonidan ishlab chiqilgan tashabbus xorijda ishlashga ketayotgan shaxslar uchun hayot va sog‘liqni sug‘urtalash bilan bir qatorda, bir qator qo‘shimcha xavf-hollarda ham moliyaviy kafolatlar yaratishni nazarda tutadi. Jumladan, quyidagi vaziyatlarda sug‘urta qoplamasi taqdim etilishi ko‘zda tutilgan:
patent yoki mehnat litsenziyasining rad etilishi;
mehnat faoliyati tufayli yuzaga kelgan kreditlarni qaytarish imkoniyati yo‘qolishi;
boshqa mehnat migratsiyasi bilan bog‘liq moliyaviy xavflar.
Tibbiy sug‘urta polislarini O‘zbekistonda yoki borilayotgan davlatning tibbiy xizmat ko‘rsatuvchi tashkilotlari orqali rasmiylashtirish mumkin bo‘ladi. Kompensatsiya to‘lovlari sug‘urta mukofoti to‘langan valyutada amalga oshiriladi.
Hayotni uzoq muddatli sug‘urtalashda sug‘urta to‘lovi sug‘urtalangan shaxs vafot etgan taqdirda yoki unga I yoki II guruh nogironlik belgilanganida to‘liq hajmda beriladi. Shuningdek, to‘plangan mablag‘ va investitsion daromadlar belgilangan yoshga yetgandan so‘ng qaytarilishi ko‘zda tutilgan.
Mazkur mexanizmning joriy etilishi mehnat migrantlarining moliyaviy va tibbiy xavflarini kamaytirishi, zarurat tug‘ilganda tezkor tibbiy yordam olish imkoniyatini kengaytirishi kutilmoqda.
