O‘zbekistonda Saudiya Arabistoniga hamshiralarni ishga jalb qilish bo‘yicha tanlov boshlandi
Tanlovda 45 yoshgacha bo‘lgan ingliz tilini biluvchi nomzodlar ishtirok etishi mumkin.
O‘zbekistonda Saudiya Arabistonining yetakchi tibbiyot muassasalariga hamshiralar va hamshiralik ishi bo‘yicha erkak mutaxassislarni ishga jalb qilish bo‘yicha keng ko‘lamli tanlov jarayonlari boshlanadi. Bu haqda Sog‘liqni saqlash vazirligi xabar berdi.
Tanlovda ishtirok etish uchun nomzodlardan hamshiralik ishi yo‘nalishi bo‘yicha bakalavr darajasiga ega bo‘lish yoki ushbu yo‘nalishdagi o‘rta maxsus tibbiy ma’lumot to‘g‘risidagi diplom hamda kamida 1 yillik ish staji talab etiladi.
Saralashda 45 yoshgacha bo‘lgan, ingliz tilida erkin muloqot qila oladigan erkaklar va ayollar qatnashishi mumkin. Arab tilini bilish ustunlik sifatida baholanadi.
Tanlov bosqichlari 2025-yil noyabr oyida Toshkent shahrida va respublikaning boshqa viloyatlarida o‘tkaziladi. Jarayonning ayrim qismi onlayn, ayrimlari esa an’anaviy tarzda o‘tkaziladi.
Ish joylari Saudiya Arabistonining eng yirik va zamonaviy tibbiyot muassasalarida taqdim etiladi. Ular orasida: Saudi German Hospital, Dr. Soliman Fakeeh Hospital, Dr. Sulaiman Al Habib Medical Group, Abeer Medical Group va boshqa nufuzli klinikalar mavjud.
Nomzodlarga 1000–1500 AQSh dollari miqdorida raqobatbardosh ish haqi taklif etiladi.
Ish beruvchi tomonidan yashash joyi, aviabiletlar, mehnat vizasi, sog‘liqni saqlash va ijtimoiy sug‘urta kabilar ta’minlanadi.
