Surxondaryoda o‘qituvchi o‘zini yoqib yubormoqchi bo‘ldi
Hodisaga u maktab direktori lavozimidan bo‘shatilgani sabab bo‘lgan.
Ijtimoiy tarmoqda Surxondaryo viloyatining Qumqo‘g‘on tumanida o‘qituvchi o‘zini yoqib yubormoqchi bo‘lgani aks etgan video tarqalmoqda. Holat yuzasidan Maktabgacha va maktab taʼlimi boshqarmasi rasmiy munosabat bildirdi.
Qayd etilishicha, mazkur maktab Arpapoya mahallasida joylashgan bo‘lib, u yerda 2010-yildan 2025-yil 16-sentyabrgacha Z.A. direktor lavozimida ishlagan. Surxondaryo viloyati Maktabgacha va maktab taʼlimi boshqarmasining 2025-yil 16-sentyabrdagi buyrug‘i bilan Z.A. bilan tuzilgan mehnat shartnomasi Mehnat kodeksining 157-moddasiga muvofiq bekor qilingan.
Shundan so‘ng sobiq direktor yangi rahbar faoliyatini boshlashiga qarshilik ko‘rsatgan. 2025-yil 13-oktyabr kuni maktabda tayinlov hujjatlari topshirilishi chog‘ida Z.A. tomonidan faol qarshilik bo‘lgan, biroq hech kim tan jarohati olmagan.
Boshqarma qaroriga ko‘ra, 39-sonli maktab rahbarligiga tegishli tartibda E.A. tayinlandi. Bugungi kunda maktabda o‘quv jarayoni barqaror holatda davom etmoqda.
