“Toshturma” avtoturargohida gashish sotgan ayol qo‘lga olindi
Ayol giyohvandlik moddasini sotayotgan vaqtida ashyoviy dalillar bilan ushlangan.
Toshkent viloyatidagi Ayollar jazoni ijro etish koloniyasi yonidagi avtoturargohda giyohvandlik moddasi savdosi bilan shug‘ullangan ayol qo‘lga olindi. U gashishni notanish shaxsga 1 million so‘mga sotayotgan vaqtida ushlandi.
33 yoshli ayol ilgari ham bir necha bor sudlangan bo‘lib, o‘g‘irlik va firibgarlik jinoyatlari uchun ozodlikdan mahrum etilgan. So‘nggi gal unga emizikli chaqalog‘i borligi bois jazoni ijro etish muddati vaqtincha kechiktirilgan edi. Ammo u shu muddatda yana yangi jinoyat sodir qilgan.
Sud tomonidan unga giyohvandlik moddalarini noqonuniy muomalaga kiritganlik uchun 6 yil 2 oy muddatga ozodlikdan mahrum qilish jazosi tayinlandi. Shu bilan birga, uning farzandlarining tarbiyasi bo‘yicha ham tegishli organlar tomonidan masala ko‘rib chiqilmoqda.
