“Davlat kuchli — to‘ntarishlarga yo‘l qo‘yilmaydi” — Sadir Japarov
Qirg‘izistonda haydovchilik guvohnomalari olish qiyinlashtirilishi ortidan bo‘layotgan noroziliklarga Sadir Japarov shaxsan munosabat bildirdi.
Qirg‘iziston prezidenti Sadir Japarov yaqinda yuzaga chiqqan noroziliklar, xususan haydovchilik guvohnomalari masalasi atrofida bayonot berdi. U aholiga murojaat qilib, haydovchilik guvohnomasini sotib olish amaliyotiga barham berilishi, endilikda haqiqiy bilim va malaka talab etilishi kerakligini ta’kidladi va buning uchun qat’iy chora ko‘rilishini ma’lum qildi.
Prezident shuningdek mamlakatdagi energetika vaziyatiga alohida e’tibor qaratdi: suv zaxiralari kamaygani va elektr importi zarurligi bois joriy chora-tadbirlar muhimligi haqida so‘zlab, oldingi yillarda to‘plangan qarzlarni qisqartirish, yangi GES loyihalarini ishga tushirish orqali mustahkamlanishga erishilayotganini bildirdi. U 2020–2025 yillarda davlat qarzini kamaytirish uchun qilingan ishlarni sanab o‘tdi va kelasi yillarda energetika sohasida investitsiyalar natija berishini aytdi.
Japarov ta’kidicha, yo‘l harakati xavfsizligini oshirish maqsadida maktablarda yo‘l qoidalari darsi joriy etiladi, haydovchilikka tayyorgarlik tizimi kuchaytiriladi va imtihonlar qat’iylashtiriladi — noqonuniy usullar bilan guvohnoma olganlarga qayta imtihon topshirish majburiyati qo‘yiladi. U provokatsiyalar va tartibsizliklarga qarshi keskin chora ko‘rilishini, davlatning barqarorligi buzilishiga yo‘l qo‘yilmasligini qayd etdi.
Prezident so‘zlarida davlat tomonidan amalga oshirilayotgan yirik energetika loyihalari — yangi kichik GESlar, Kambar-Ata, va boshqa infratuzilma ishlari haqida ham ma’lumot berildi; u bular amalga oshgach Qirg‘iziston energetik jihatdan mustaqil va eksportchi davlatga aylanishini ta’kidladi. Japarov aholidan hozirgi qiyinchiliklarga sabr qilish va energiyani tejashni davom ettirishni so‘radi.
