O‘zbekistonda narkojinoyatlar haqida xabar qilganlar mukofotlanadi
Hukumat giyohvandlikka qarshi kurashni mustahkamlash uchun fuqarolarni rag‘batlantirish va tezkor tekshiruv tizimini joriy etishni rejalashtirmoqda.
Prezident farmoni asosida narkotik vositalarning noqonuniy muomalasi haqida xabar bergan yoki aniqlashga ko‘maklashgan fuqarolar munosib rag‘batlantirilishi belgilandi. Buning tartibini Narkotiklar va o‘qotar qurollarni nazorat qilish agentligi ishlab chiqib, Vazirlar Mahkamasiga kiritadi — deya xabar beradi hukumat qaror loyihasi.
Ichki ishlar vazirligi 2025 yil yakunigacha mahallalarda xizmat qiluvchi profilaktika inspektorlarini noqonuniy narkolaboratoriyalar va qo‘lbola qadoqlash sexlarini aniqlash bo‘yicha o‘qitishni tashkil etadi. Shu bilan birga, samarali faoliyat ko‘rsatgan xodimlarni byudjetdan tashqari mablag‘lar orqali rag‘batlantirish yoki mahallada aniqlangan taqdirda boshqa idoralar tomonidan intizomiy chora qo‘llash tartibi joriy etiladi.
Hujjatda 2026-yil 1-martga qadar ichki ishlar organlari uchun giyohvandlik vositalarini ekspress aniqlashga mo‘ljallangan zamonaviy texnik vositalar xarid qilinishi va amaliyotga joriy etilishi nazarda tutilgan. Bundan tashqari, psixotrop va kuchli ta’sir qiluvchi moddalar aylanmasiga qarshi chora-tadbirlar kuchaytiriladi, jazolar og‘irlashtiriladi va yoshlar ishtirokidagi jinoyatlar uchun alohida qat’iy chora belgilanishi ko‘zda tutilgan.
