AQShda 40 kunlik tanaffus yakunlanmoqda - hukumat qayta ish boshlaydi
1,5 milliondan ortiq davlat xizmatchilari va harbiy xizmatchilar ishga qaytmoqda.
AQShda 40 kun davom etgan hukumat faoliyatining qisman to‘xtatilishi yakunlanmoqda. Senatorlar ikki partiya — demokratlar va respublikachilar o‘rtasida federal idoralarni qayta ishga tushirish imkonini beruvchi kelishuvni ma’qullashdi deb xabar berdi CNN.
Mazkur kelishuv natijasida 1,5 milliondan ortiq davlat xizmatchilari va harbiy xodimlar o‘z faoliyatini qayta boshlaydi. Hukumatning yopilishiga sog‘liqni saqlash dasturlarini moliyalashtirish bo‘yicha kelishmovchiliklar sabab bo‘lgan edi. Demokratlar Medicaid dasturiga subsidiyalarni saqlab qolish va sug‘urta soliqlari bo‘yicha imtiyozlarni kengaytirishni talab qildi, respublikachilar esa ushbu takliflarga qarshi chiqdi.
Murosaga erishishda Senatdagi respublikachilar yetakchisi Jon Tunning tashabbusi muhim omil bo‘ldi. U sog‘liqni saqlash subsidiyalariga oid masalani alohida ovozga qo‘yishni taklif etganidan so‘ng tomonlar bitimga kelishdi. Kelishuv xodimlarni to‘liq ishga qaytarish va ular faoliyat to‘xtagan vaqt uchun kompensatsiya to‘lashni ham nazarda tutadi.
Mazkur yopilish AQSh tarixida eng uzoq davom etgani bilan qayd etildi. Bungacha rekord 35 kun bo‘lib, u 2019-yilda Donald Tramp prezidentligi davrida kuzatilgan edi.
Uzoq davom etgan to‘xtalish ijtimoiy dasturlar faoliyatining qisqarishiga, aholining oziq-ovqat yordami hajmining kamayishiga, 1500 ga yaqin aviaqatnov bekor qilinishiga va iqtisodiyotga har kuni milliardlab dollar yo‘qotishlarga sabab bo‘ldi.
Kelishuv endi Vakillar palatasi tomonidan tasdiqlanishi hamda Prezident imzosidan so‘ng kuchga kiradi. Shundan keyin federal idoralar to‘liq faoliyatini tiklaydi.
