Guliraʼno Qosimovaning sud ishi ochiq ko‘riladigan bo‘ldi

Avvalroq ijtimoiy tarmoqda Farg‘ona viloyati Furqat tumanidagi 29-sonli umumtaʼlim maktabi direktori Guliraʼno Qosimova sud ishida unga adolatsiz munosabat qilinayotganini aytib, ishni ochiq sud muhokamasi orqali ko‘rib chiqishni talab qilib chiqqani aks etgan videomurojaat tarqalgandi.

 

Holat yuzasidan Farg‘ona viloyat sudlari rasmiy munosabat bildirdi. Qayd etilishicha, ayni paytda jinoyat ishlari bo‘yicha Quva tuman sudida A. X. va J. R.ga oid jinoyat ishi ko‘rib chiqilmoqda.

 

Joriy yilning 15 oktyabr kuni mazkur jinoyat ishini ko‘rish davomida jinoyat ishiga ilova qilingan jabrlanuvchilarning kiyimsiz holdagi videoyozuvi jabrlanuvchi G. Qosimova va uning himoyachisi - advokat M. Axmadaliyevning iltimosnomasiga asosan muxrlanib maxfiylashtirilgan.

 

24 oktyabr kuni o‘tkazilgan sud majlisida Furqat tuman IIB xodimlari va ekspertlarni so‘roq qilishda tezkor qidiruv faoliyatiga taalluqli maxfiy maʼlumotlar oshkor bo‘lishini oldini olish hamda yuqorida maxfiylashtirilgan videoyozuvni ko‘rsatish lozimligi sababli sud majlisining ularga nisbatan qismi yopiq sud majlisida o‘tkazish belgilangan. Sud majlisining Furqat tuman IIB xodimlarini so‘roq qilishdan qolgan barcha qismi ochiq sud majlisida o‘tkazilmoqda.

 

7 noyabr kuni o‘tkazilgan sud majlisida jabrlanuvchi G. Qosimova sud majlisini o‘tkazish tartibini buzgani sababli qonunchilikda belgilangan tartibda qonuniy chora ko‘rilishi haqida ogohlantirilgan bo‘lsada, ogohlantirish taʼsir qilmasdan takroran sud majlisida tartibni buzib, raislik qiluvchining farmoyishiga bo‘ysunmasdan va sudni behurmat qilganligi sababli sudning ajrimiga asosan 2025 yil 7 noyabr kuni o‘tkazilgan sud majlisidan (shu kungi) chiqarib yuborilgan.

 

Keyingi sud majlisi 12 noyabr kuni soat 10:00 da o‘tkazilishi belgilanib, sud jarayoni ochiq tarzda bo‘lib o‘tadi.