IIBB: Toshkentda tarqalgan “OIV/OITS yuqtiruvchi igna” videosi sahnalashtirilgan
Ijtimoiy tarmoqlarda ikki shaxs tomonidan ataylab “layk” va ko‘rishlar yig‘ish maqsadida sahnalashtirilgan video tarqatilgan.
Toshkent shahrida ijtimoiy tarmoqlarda tarqalgan “yuqumli igna” haqidagi video asossiz va sahnalashtirilgan ekani aniqlandi. IIBB tomonidan olib borilgan surishtiruv natijasida video ikki shaxs tomonidan ataylab “layk” va ko‘rishlar yig‘ish maqsadida sahnalashtirilgani ma’lum bo‘ldi. Holat yuzasidan tegishli hujjatlar rasmiylashtirilib, ish sudga yuborildi.
Videoda go‘yoki shahar bog‘ida skameyka ustidan topilgan igna orqali OIV/OITS yuqtirish xavfi mavjudligi haqidagi iddaolar keltirilgan. Ushbu mazmun jamoatchilik o‘rtasida tashvish va muhokamalarga sabab bo‘lgan.
Surishtiruv davomida ishtirokchilardan biri mazkur harakat sahnalashtirilganini tan olib, keng auditoriya e’tiborini qozonish maqsadida tasvirga olinganini bildirdi. U qilgan ishi uchun afsusda ekanini va jamoatchilikdan uzr so‘rashini ma’lum qildi.
Ichki ishlar vazirligi O‘zbekistonda jamoat joylarida tasodifiy igna sanchilishi oqibatida OIV/OITS yuqtirilgan holatlar qayd etilmaganini ma’lum qildi. Mutaxassislarning ta’kidlashicha, OIV tashqi muhitda barqaror emas: ochiq havoda va quyosh nuri ta’sirida virus 2–5 soat ichida yuqtirish xususiyatini yo‘qotadi. Shuningdek, bunday holat sodir bo‘lganda 72 soat ichida OITSning oldini olish markaziga murojaat qilish orqali infeksiya yuqishining oldi to‘liq olinishi mumkin.
Mazkur holat bo‘yicha videoni yaratgan shaxslarga nisbatan Ma’muriy javobgarlik to‘g‘risidagi kodeksning 202-2-moddasi (“Yolg‘on ma’lumot tarqatish”) bilan ish qo‘zg‘atilgan. Endilikda ular bazaviy hisoblash miqdorining 50 baravaridan 100 baravarigacha miqdorda, ya’ni 20 mln so‘mdan 41,2 mln so‘mgacha jarima bilan jazolanishi mumkin.
