Markaziy bank 18 ta bankni jarimaga tortdi — bu safar nomlari ochiqlandi
Banklar rasmiy saytlarida axborotni davlat tilida joylashtirmagani va shaffoflik talablarini buzganlikda ayblangan.
Markaziy bank joriy yilning sentabr–oktabr oylarida tijorat banklarining rasmiy veb-saytlarida axborotlarni e’lon qilish tartibiga rioya etilishi bo‘yicha o‘tkazgan monitoring yakunlarini e’lon qildi. Tekshiruv natijasiga ko‘ra, belgilangan talablarni buzgan 18 ta bankka ma’muriy choralar ko‘rildi.
Unga ko‘ra, har bir bankka 102 million so‘mdan, jami 1 milliard 836 million so‘m miqdorida jarima qo‘llangan.
Markaziy bank ma’lumotiga ko‘ra, ayrim banklar veb-saytlarida axborotlar “Davlat tili haqida”gi Qonun talablari asosida davlat tilida joylashtirilmagani aniqlangan. Shuningdek, kredit ta’minoti sifatida qabul qilingan garov mulklarini kredit asosiy qarz qoldig‘iga mutanosib ravishda bosqichma-bosqich garovdan chiqarish tartibi joylashtirilmagani ma’lum bo‘ldi.
Mazkur holatlar quyidagi banklarning rasmiy internet sahifalarida aniqlangan: Agrobank, Anor Bank, Hayot Bank, Universal Bank, Garant Bank, Asakabank, Turonbank, Infinbank, Mikrokreditbank, Trustbank, Madad Invest Bank, Saderat Bank, Orient Finans Bank, Ipoteka Bank, Tenge Bank, Ziraat Bank Uzbekistan, AVO Bank va Open Bank.
Markaziy bank tijorat banklariga qonunchilik talablariga qat’iy rioya etish, aholiga taqdim etiladigan axborotning to‘liqligi va ochiqligini ta’minlash zarurligini eslatdi.
