Tramp: Har bir amerikalik kamida 2000 dollar oladi
AQSh prezidenti bojxona daromadlarini aholiga taqsimlash tashabbusini e’lon qildi.
Donald Tramp mamlakat aholisi uchun yangi moliyaviy tashabbusni e’lon qildi. Unga ko‘ra, bojxona tariflaridan yig‘iladigan tushumlar hisobidan har bir amerikalik fuqaroga kamida 2000 dollardan to‘lov amalga oshirilishi rejalashtirilmoqda. Bu haqda Tramp o‘zining Truth Social ijtimoiy tarmog‘idagi sahifasida ma’lum qildi.
Trampning aytishicha, to‘lovlar faqat yuqori daromadli shaxslarni istisno qilgan holda barcha amerikaliklarga beriladi. Prezident tariflar siyosatini tanqid qiluvchilarni keskin tanqid qilib, ularni “ahmoqlar” deb atadi.
“Qo‘shma Shtatlar tariflar orqali trillionlab dollar daromad oladi va bu mamlakatning davlat qarzini qisqa muddatda yopishga imkon beradi”, — deya ta’kidladi Tramp.
Eslatib o‘tamiz, 2025-yil aprel oyida Donald Tramp qator davlatlarga nisbatan bojxona tariflarini joriy etishini ma’lum qilgan edi. Uning fikricha, bu chora AQShning manfaatlarini himoya qilish uchun zarur, chunki Qo‘shma Shtatlar “ko‘p yillar davomida yaqin hamkorlar ham, raqib davlatlar ham tomonidan iqtisodiy bosim va ekspluatatsiyaga uchragan”.
