MIBdan qarzi bor fuqarolarning mashinalari xatlanmoqda
YHXB xodimlari bilan hamkorlikda o‘tkazilgan reyd tadbirlarida qidiruvdagi avtotransport vositalari aniqlanmoqda.
Majburiy ijro byurosi Toshkent viloyat boshqarmasi va uning hududiy bo‘limlari tomonidan IIB YHXB xodimlari bilan hamkorlikda yo‘l harakati qoidalarini buzganlik uchun qo‘llanilgan maʼmuriy jarimalarni undirish borasida qo‘shma reyd tadbirlari o‘tkazilmoqda.
Xususan, joriy yilning o‘tgan davrida maʼmuriy jarimani to‘lashdan bosh tortgan qarzdorlarga tegishli bo‘lgan 59 ta avtotransport vositalari jarima maydonchasiga joylashtirilgan.
O‘tkazilayotgan reyd tadbirlarining 476 mln. so‘mga yaqin 42 ta ijro hujjatlarining ijrosi taʼminlanib, 38 ta qarzdorligi mavjud, biroq o‘z muddatida bartaraf etmagan qarzdorlarning avtotransport vositalari jarima maydoniga joylashtirilib, qidiruvda bo‘lgan transport vositalari aniqlanmoqda.
Jumladan, qarzdor “S.G.” korxonasidan undiruvchi tashkilot foydasiga 273,5 mln.so‘m qarzdorlikni undirish bo‘yicha ijro hujjatiga asosan qarzdor korxonaga tegishli bo‘lgan "BYD SONG PLUS DM" avto transport xatlangan.
Shuningdek, yo‘l harakati qoidalarini buzganlik uchun yuzaga kelgan maʼmuriy jarimalarni o‘z vaqtida to‘lamasdan, qarzdorlikni bartaraf etmayotgan ayrim shaxslarning qidiruvda bo‘lgan avtotransport vositalari ham olib borilayotgan reyd tadbirlari davrida aniqlanmoqda.
Misol uchun, qarzdor S.E.dan jami 10 ta IIB YXXBning qaroriga asosan 22.676.125 so‘m maʼmuriy jarima undirish to‘g‘risidagi ijro hujjatlariga asosan qarzdorning nomida va qidiruvda bo‘lgan “COBALT” avtotransport vositasi tegishli tartibda topilib jarima maydoniga joylashtirilgan.
