"O‘zbekiston AQShning kichik yadroviy reaktor texnologiyalarini o‘rganadi" — "O‘zatоm" rahbari
Mamlakat atom energetikasida hamkorlikni kengaytirib, texnologiyalarni diversifikatsiya qilish siyosatini davom ettirmoqda.
O‘zbekiston Amerikaning kichik modulli yadroviy reaktor (SMR) texnologiyalarini o‘rganishga qiziqish bildirmoqda. Bu haqda «O‘zatоm» agentligi direktori Azim Axmedxadjayev Gazeta’ga bergan intervyusida ma’lum qildi. Uning aytishicha, sentabr oyida Nyu-Yorkda O‘zbekiston va AQSh o‘rtasida atom energiyasidan tinch maqsadlarda foydalanish bo‘yicha anglashuv memorandumi imzolangan.
Azim Axmedxadjayevning ta’kidlashicha, Prezident Shavkat Mirziyoyevning AQShga tashrifi chog‘ida hamkorlik yanada kengaytirilgan va O‘zbekiston Holtec, GE Hitachi hamda NuScale kabi Amerika kompaniyalarining sertifikatlangan SMR loyihalarini o‘rganishga tayyorligini tasdiqlagan. Bu yo‘nalish O‘zbekistonning energetika xavfsizligini mustahkamlash va kelajakdagi talabni qoplashga qaratilgan.
«O‘zatоm» rahbari mamlakat energiya sohasida ko‘p vektorli siyosatni davom ettirayotganini qayd etdi. Hozirda Rossiya bilan RITM-200N reaktorlariga asoslangan kichik AЭС qurilishi, Xitoy bilan SMR va uranni qayta ishlash bo‘yicha hamkorlik davom etmoqda. Amerika texnologiyalarini o‘rganish esa mavjud yo‘nalishlarni diversifikatsiya qilishning mantiqiy bosqichi sifatida baholandi.
AQSh bilan tuzilgan kelishuv doirasida kadrlar tayyorlash va qo‘shma ilmiy-amaliy dasturlarni yo‘lga qo‘yish rejalashtirilgan. SMRlarning referent namunalarini tahlil qilish orqali O‘zbekiston 2050-yilgacha kutilayotgan elektr energiyasi iste’moli o‘sishiga mos ravishda barqaror energiya ta’minotini shakllantirishni maqsad qilmoqda.
