O‘zbekiston va AQSH viza tartibini soddalashtirish masalasini ko‘rib chiqmoqda
Yaqinda amerikaliklar uchun O‘zbekistonga 30 kungacha vizasiz kirish mumkinligi eʼlon qilingandi.
O‘zbekiston va AQSH fuqarolar hamda biznes uchun viza rejimini soddalashtirish masalasini ko‘rib chiqmoqchi. Bu haqida Transport vaziri o‘rinbosari Jasurbek Choriyev “O‘zbekiston24” telekanaliga bergan intervyusida maʼlum qildi.
“Yaqinda qabul qilingan amerikaliklar uchun vizalarni bekor qilish to‘g‘risidagi qarorni hisobga olgan holda, bu yerda turizm ham rivojlanadi. Fuqarolarimiz va biznes uchun [viza tartibini] soddalashtirish masalasi ko‘rib chiqiladi”, — dedi vazir o‘rinbosari.
Transport vaziri o‘rinbosariga ko‘ra, Uzbekistan Airways va Boeing o‘rtasidagi 22 ta 787-9 Dreamliner samolyotlarini yetkazib berish bo‘yicha shartnoma tuzilishi uzoq yo‘nalishlarga, xususan AQSH shaharlariga parvozlar geografiyasini kengaytirish imkonini beradi.
Joriy yilning 3 noyabr kuni O‘zbekistonga AQSH fuqarolari uchun 30 kungacha vizasiz rejim joriy etilgani haqida Prezident farmoni qabul qilingan edi.
Undan oldin may oyida esa Shavkat Mirziyoyev O‘zbekistonga sayyohlar oqimini ko‘paytirish chora-tadbirlarini tasdiqlagan edi. O‘shanda Tashqi ishlar vazirligiga AQSH fuqarolari uchun 30 kungacha vizasiz rejim bo‘yicha takliflar kiritilishni topshirgan edi. O‘z navbatida, Amerika tomonida o‘zbekistonliklar uchun viza rejimini yengillashtirish kutilgan edi.
O‘zbekiston Prezidenti Administratsiyasi rahbari maslahatchisi Komil Allamjonovga ko‘ra, oktyabr oyidagi uchrashuvda AQSH Davlat kotibining birinchi o‘rinbosari Kristofer Landau va AQSH prezidentining Janubiy va Markaziy Osiyo bo‘yicha maxsus vakili Serjio Gor amerikaliklar uchun vizalarni bekor qilish masalasini ko‘targan. Allamjonovning aytishicha, O‘zbekiston AQSHlik sayyohlar uchun ochiq.
U B1/B2 (xususiy ishbilarmonlik safari) vizalarining muddatini 1 yildan 10 yilgacha uzaytirish O‘zbekiston va AQSH o‘rtasidagi aloqalarni yana-da mustahkamlash yo‘lidagi katta qadam bo‘lishini aytgan edi.
