“Rahmonov yana javobsiz qoldi, javobgarlik pastdagi xodimlarga yuklandi” — Kusherbayev
174 tup daraxt kesilishi bo‘yicha jinoyat ishi ochilgan, biroq buyruq bergan amaldor tergov doirasidan tashqarida qolayotgani aytilmoqda.
Toshkentning Yakkasaroy tumanida moratoriyga zid ravishda 174 tup daraxt kesilishiga oid jinoyat ishi obodonlashtirish bo‘limi mansabdorlariga nisbatan qo‘zg‘atildi. Bu haqda Ekologiya vaziri maslahatchisi Rasul Kusherbayev ma’lum qildi. Daraxtlarning kesilishi oqibatida davlatga 1,46 milliard so‘mdan ortiq zarar yetkazilgani qayd etilgan.
Kusherbayevga ko‘ra, jinoyat ishi Jinoyat kodeksining 198-moddasi 2-qismi (ko‘p miqdorda zarar keltirgan holda noqonuniy daraxt kesish) bilan qo‘zg‘atilgan. Biroq daraxtlarni kesish haqida topshiriq bergani aytilayotgan shahar hokimining birinchi o‘rinbosari Baxtiyor Rahmonov javobgarlikdan chetda qolayotgani tanqid qilindi.
“Topshiriqni bergan rahbar emas, balki uni bajarishga majbur bo‘lgan oddiy xodimlar javob berishi — bu nomardlik,” deya ta’kidladi Kusherbayev. Hozirda tergov jarayoni davom etmoqda.
Zamon.uz Bosh prokuratura va Ekologiya vazirligiga murojaat qilganida, hozircha rasmiy tasdiq berilmadi. Eslatib o‘tamiz, daraxtlar 25-oktabr kuni tunda kesib tashlangan bo‘lib, voqea ortidan hokimlik ushbu holat uchun jamoatchilikdan uzr so‘ragandi.
