Sherzod Asadov Yevropada xavfsizlik va hamkorlik tashkilotining OAV erkinligi bo‘yicha vakili bilan uchrashdi
Toshkentda bo‘lib o‘tadigan Markaziy Osiyo media konferensiyasiga tayyorgarlik masalalari muhokama qilindi.
Prezident matbuot kotibi Sherzod Asadov O‘zbekistonda tashrif bilan bo‘lib turgan Yevropada xavfsizlik va hamkorlik tashkiloti (YXHT)ning OAV erkinligi bo‘yicha vakili Yan Bratu bilan uchrashdi. Tomonlar O‘zbekiston va YXHT o‘rtasidagi axborot sohasidagi hamkorlik masalalarini muhokama qildi.
Uchrashuvda 13—14-noyabr kunlari Toshkentda o‘tkaziladigan YXHTning “Xabardor va barqaror jamiyatlar uchun ommaviy axborot vositalarining hayotiyligini ta’minlash” mavzusidagi 25-Markaziy Osiyo media konferensiyasiga tayyorgarlik jarayonlari ko‘rib chiqildi. Sherzod Asadovning ta’kidlashicha, so‘nggi yillarda O‘zbekistonda so‘z erkinligi, davlat siyosatining ochiqligi va OAVning mustaqil faoliyati uchun sharoitlar yaxshilanmoqda.
Konferensiya davomida media muhit barqarorligi, jurnalistlar faoliyati, ishonchli axborot tarqatish va media iqtisodiyoti kabi masalalar muhokama qilinishi rejalashtirilgan. Xususan, mediasavodxonlikni oshirish, faktchekingni rivojlantirish hamda dezinformatsiyaga qarshi kurashish mavzulari diqqat markazida bo‘ladi.
Uchrashuv chog‘ida tajriba almashish, jurnalistlar malakasini oshirishga qaratilgan qo‘shma dasturlar, treninglar va ekspertlar ishtirokidagi tadbirlar o‘tkazish istiqbollari ham muhokama qilindi. Tomonlar ochiq va konstruktiv hamkorlikni davom ettirishga tayyor ekanini bildirdi.
