Toshkentda 37 mingdan ortiq liftlarda nosozlik aniqlandi
6 800 ta lift hali texnik ko‘rikdan o‘tmagan bo‘lib, ularga ogohlantiruvchi belgilar qo‘yildi.
Toshkent shahridagi ko‘p qavatli uylar liftlarining texnik holati o‘rganilib, xavfsizlik talablari yuzasidan keng ko‘lamli tekshiruv ishlari amalga oshirildi. Tekshiruv jarayonida 9 100 ta lift ko‘zdan kechirilib, ularda jami 37,1 mingdan ortiq nosozlik qayd etildi. Ma’lumotlar “Xavfsiz lift” elektron tizimiga kiritildi.
Shahar qo‘mitasi raisi Olimjon Jo‘raevning ta’kidlashicha, ayrim liftlar belgilangan majburiy texnik ko‘rikdan o‘tmasdan foydalanishda bo‘lgan va xavfsizlik standartlariga javob bermagan.
Aholi uchun liftning texnik holatini tezda aniqlash imkonini yaratish maqsadida barcha lift kabinalariga maxsus rangli stikerlar o‘rnatiladi:
- Yashil — holati yaxshi
- Ko‘k — qisman nuqsonli
- Sariq — nosoz
- Qizil — xavfli
2026-yil 1-iyuldan boshlab texnik talablarga javob bermaydigan liftlardan foydalanish qat’iyan taqiqlanadi. Hozircha ko‘rikdan o‘tmagan 6 800 ta liftga “Lift texnik ko‘rikdan o‘tmagan” degan ogohlantiruvchi belgilar o‘rnatildi.
