Bank hisobvaraqlarini ochish, yuritish va yopishning yangi tartibi belgilandi
Endilikda fuqarolar eskrou hisobvaraqlarini ochishi, hujjatlarni elektron tarzda topshirishi va voyaga yetmaganlar nomiga ham hisobvaraq ochish imkoniga ega bo‘ladi.
Adliya vazirligi ma’lum qilishicha, “Bank hisobvaraqlarini ochish, yuritish va yopish tartibi to‘g‘risidagi yo‘riqnoma”ga o‘zgartirishlar kiritildi (ro‘yxat raqami 3420-2, 2025-yil 11-noyabr). Yangi tartib fuqarolar va tadbirkorlar uchun bank xizmatlaridan foydalanishni yanada qulaylashtiradi.
Endilikda mijozlar banklarda eskrou hisobvaraqlarini ochishlari mumkin bo‘ladi. Bu hisobvaraqlar elektron tijorat, ulushli shartnomalar va boshqa bitimlar jarayonida xavfsiz hisob-kitob qilish uchun mo‘ljallangan. Shuningdek, shaxsni tasdiqlovchi hujjatlar hamda o‘zini o‘zi band qilgan shaxs to‘g‘risidagi ma’lumotnomalarni my.gov.uz yoki “Ijtimoiy karta” ilovasi orqali elektron shaklda taqdim etish mumkin bo‘ladi.
Yangi tartibga ko‘ra, norresidentlar ilgari shu bankda hisobvaraq ochgan bo‘lsa, yangi hisobvaraqni masofadan turib ochishi mumkin. Shuningdek, 14 yoshgacha bo‘lgan bolalar uchun hisobvaraqni ota-ona yoki qonuniy vakil ochishi mumkin, 14 yoshdan 18 yoshgacha bo‘lgan o‘smirlar esa milliy va chet el valutalarida depozit yoki metall hisobvaraqlarni mustaqil ravishda ochish huquqiga ega bo‘ldilar.
