Istanbul sobiq meri Ekrem Imomog‘li 2000 yilgacha qamalishi mumkin
U 143 ta epizod bo‘yicha, jumladan, firibgarlik va poraxo‘rlikda ayblanmoqda.
Istanbul Bosh prokuraturasi shahar sobiq meri, muxolifatdagi siyosatchi Ekrem Imomog‘liga nisbatan olib borilgan tergovni yakunladi va unga 828 yildan 2300 yilgacha ozodlikdan mahrum etish jazosi tayinlashni so‘radi.
Ayblov xulosasiga ko‘ra, Imomog‘li jinoiy guruh tuzish va unga rahbarlik qilish, poraxo‘rlik, firibgarlik, noqonuniy bitimlar orqali Istanbul shahriga 3,8 milliard dollarlik zarar yetkazganlikda ayblanmoqda.
Prokuratura tomonidan tayyorlangan 3900 betlik hujjatda jami 143 ta jinoiy epizod qayd etilgan.
Ekrem Imomog‘li 2019-yilda Jumhuriyat Xalq partiyasi (CHP) nomzodi sifatida Istanbul meri etib saylangan edi. U Turkiya prezidenti Rajab Toyyib Erdo‘g‘anning asosiy siyosiy raqiblaridan biri sifatida tilga olinib, 2028-yilgi prezidentlik saylovlarida ishtirok etishi mumkin bo‘lgan nomzodlar ro‘yxatiga kiritilgan edi.
Imomog‘li 2025-yil mart oyida munitsipal tenderlar jarayonida vakolatni suiiste’mol qilishda ayblanib hibsga olingan. Hibsga olinishi ortidan Istanbulda ommaviy norozilik namoyishlari yuz bergan, ular politsiya tomonidan kuch bilan tarqatilgan.
Shuningdek, Istanbul universiteti shu yilning o‘zida Imomog‘lidan prezidentlik saylovlariga nomzod sifatida qatnashish uchun zarur bo‘lgan diplomini qaytarib olgan.
2025-yil iyul oyida sud Imomog‘lini davlat amaldorini omma oldida haqorat qilishda aybdor deb topgan va 1 yil 8 oy muddatga ozodlikdan mahrum etgan. Boshqa ayrim ayblovlar bo‘yicha esa u oqlangan edi.
