Jizzaxda tuman Favqulodda vaziyatlar bo‘limi boshlig‘i pora bilan ushlandi
U loyihalarni tasdiqlash evaziga 200 dollar va 6 million so‘m talab qilgan.
Davlat xavfsizlik xizmati va prokuratura organlari tomonidan o‘tkazilgan tezkor tadbir natijasida Jizzax viloyatidagi tuman favqulodda vaziyatlar bo‘limi boshlig‘i pora olayotgan vaqtida qo‘lga olindi.
Tekshiruvlarga ko‘ra, mansabdor shaxs joriy yil sentabr oyida mahalliy tadbirkorga tegishli ko‘p qavatli uy qurilishi loyihasini tasdiqlash uchun 200 AQSh dollari miqdorida pora talab qilib olgan.
Shundan so‘ng u xususiy maktab loyihasini tasdiqlash evaziga yana 6 million so‘m so‘ragan. Tezkor tadbir chog‘ida u pularni rafiqasi orqali olayotgan vaqtida qo‘lga olingan.
Holat yuzasidan mansabdor shaxsga nisbatan Jinoyat kodeksining 210-moddasi 2-qismi “a” va “b” bandlari (“Pora olish”) bilan jinoyat ishi qo‘zg‘atildi. Sud tomonidan unga nisbatan qamoqqa olish ehtiyot chorasi qo‘llanilgan.
Qonunchilikka ko‘ra, ushbu turdagi jinoyatlar uchun 5 yildan 10 yilgacha ozodlikdan mahrum qilish jazosi nazarda tutilgan.
